أم بريص – زاوية ساخرة

كانون ثاني وكانون النار

أم محمد زلمتها أفلس من نقلة الحطب هالسنة.

قالت له: حطب ومنته جايب، هات أقل حاجة كانون، ودنا على القبظة نجيب كيس فحم عشان ندفي الظعوف عن هالبرد.

قال لهيه: كانون مش جايب، وإنتن يالحريم مش مدبرات حالكن. إقلبي الصاج ولمنكي تجيبي فحم حطيه في الصاج.

قالت له: حتى الصاج مبعوج، وبطهي على الشبك، وبلمّ جلة وبطهى بهيّه، عشان أسلّك رغيف الخبز وأستر وجهك لمنه يجي عليك ظيف ودّه يتعشى ويلقى خبز.

قال: والله إنكي أصيلة يا بنت الأجواد، ولونها وحدة ثانية غير تخلينا نشتهي رغيف الصاج. وأفا عليكي يا أم محمد، بكره بنقبظ وبنجيب لكيّه اللي ودكي إياه.

 

 

صفقنيوت

حريم العرب بياكلن سفقنيوت.

أم جفال قالت لجوزها: وديه صفقنياه.

قام وصفقها كف!! وقال لهيه: خبز عليه سكر زي الزلابيه، وبيرشوا عليه شوية تطلي، وهذا الصفقنيوت اللي بتسمعي فيه!!.

 

السجاد

الحريم من كثر وهنه مقرورات من بعظهن، صارن يشرن من أحسن السجادات على البيوت من فوق. عشان يقولوا والله فلانة عندها سجاد فوق الدار من أغلى نوع، يعني بيتفاخرن بالبطانيات والسجاد والحصاير، على ريحة هالشمسية.

 

التوم والوسم

أبو جيري عنده توم ظعوف، وزي بعظهم بالنقطة.

مسك واحد منهم وذبحه من الكتل، وقال لا تلعب في الشارع.

أبو جيري خش في الدار ولقيه ثاني مرة هو اللي كتل كتلة، قال له: أناه ما قلت لك هاتي لي صندوق دخان، وقاعد لي في الدار؟ وذبح العيل من الكتل.

أم العيال رحمت ظعوفها وقالت له: عشان تعرفهم من بعظهم، كل أسبوع بوسم لك واحد.

 

 

طبخة العدد

نقدم لكم هذا العدد كيفية تحضير فتة العدس المشهورة بمناسبة فصل الشتاء:

المقادير:

نص كيلو عدس

راس بصل صغير

نص كاس زيت

نص معلقة ملح

نص معلقة فلفل أسمر

نص معلقة حوايج

كوب ميه

معلقة صغيرة مراق عوف (يعني دجاج)

طريقة التحضير:

أولاً نغلي الزيت، وونفرم البصل لقطع صغيرة. نقلي البصل، وبعد خمس دقايق واحنا بنحرك فيه يعني نص استيواي، بنحط العدس. وبعد خمس دقايق واحنا بنحرك فيه بنحط المية لمدة نص ساعة.

بنلحقه معلقة ملح، وبعدين الفلفل والحوايج والمراق، وبنحركه بمعدل خمس دقايق.

بعدين بننزل الطاسة، غير وإم جفال فاتة خبز صاج، وفتة للعيال، وصحتين وعافية على قلوبكو.

مع تحيات الشيف رمزور

 

 

المديون

أبو جفال مديون لناس كثيرين دراهم، ولمنهم بيدوروا عليه في البيت مشان الدراهم: أبو جفال ما هو هنيه. والناس المديون لهمه

ولمنهم ودهم إياه لعزومة: أبو جفال هنية!! وكمان زمين للناس المش مديون لهمه.

أما الناس المديون لهمه حاطهم في الزخارون يعني في ذاكرة التلفون.

 

الساعة

أم جفال بتقعد بدري الصبح، وكل ما تقعد بتمسك إيد أبو جفال وبتلويها عشان تشوف الساعة.

وفي الليل بتلويها أكثر من مرة.

سوّت لحالها مشكلة، وأكلت كتلة، وعوّلت أكثر من شهرين.

أبو جفال صار يِظحي، وما بيمشي على الشغل بدري.

وظعوف المدارس صاروا يمشوا على العشرة للمدرسة، وبدون غدا ولا عشا.

مشى أبو جفال ورظاها من أبوها، وجاب لهيه ساعة منبه وساعة ذهب للإيد. وقال لهيه: حقكي علينا، صبرتي وما قلتي وديه ساعة. بس ديري بالكي ثاني مرة تلوي إيديه وأناه نايم!!.

 

 

سلام السواقين

سواق بيرد السلام على سواق ملاقيه. هذا مش في التورية، هذا في الواقع.

السواق الأول بيرفع إيده يعني السلام، والسواق اللي ملاقيه بيقول عليكم السلام وما بيرفع إيده ولا اصبعه. وإيش رايكو في الموظوع؟

 

سلام

في ناس بترد السلام

وفي ناس بتدور السلام

والسلام لله وفيه حسنات

 

خدمات

في ناس بتخدم في الجيش

وفي ناس بتخدم في البيت

وفي ناس بتخدم خدمة العمر

وفي "خَدمة" للبنطالون

 

طرقات

في ناس بتطرق الباب

وفي ناس بتطرق اليمين

وفي ناس بتطرق الحديد وهو حامي

 

قطعات

في ناس بتنقطع عنهم القبظة

وفي ناس بتنقطع عنهم المية

وفي ناس مقطوعة من القبظة والمية

وفي ناس مقطوعة من الأم والأبو، يعني أيتام

 

كلمات ولكمات

في ناس بتاخذ من الكتب كلمات وبتتعلم.

وفي ناس بتاخذ لكمات وما بتتعلم.

 

مشطات

في ناس بتمشط في الأرض

وفي ناس بتمشط في الراس

وفي ناس بتمشط يعني بتدور على ناس