|
أم بريص – زاوية ساخرة
الصحون الطائرة
الصحن اللي مركبه أبو سالم فوق الشق، طار من الريح
الشرقية.
قام ودّه يركب بداله الصاج، وما نفع. وصحّت له بهدلة من
أم سالم.. وقالت له: منته لاقي غير الصاج؟ والمصيبة باعجه.
قالت له: والله غير تجيب رغفان شخور وتاكل، وريّحتنيه
من طهاية الصاج في الشرقية.
خلي القطار يفوتنا
أبو جفال صاير في المدة الأخيرة رجل انهزامي مستسلم.
بيقول: لا حدّ يلاحق التكنولوجيا.. لأنها ما لهيه حدّ..
والحدّ هو إنك تحطّ مصاريف... واحنا ما ودنا الزمن يسبقنا ونستبيخ..
ونتأقلم بدفاشة.. ويقولوا الولد سابق سنّه..
هذا زمن السرعة.. وخلينا منه.. وخلي القطار يفوتنا.
المتلبد يتلبد
أبو محمد بيتلبد لدائرة الأراظي عشان تصح له قطعة
يحرثها للحلال.
وبعدها صار يتلبد لمكركعيم عشان يصح لحريمه أكمن مقراش.
والمشكلة ودّه لحريمه اللي عنده إزرحوت.. وصار يتلبد
لمسراد هبنيم مشان الإزرحوت.
ومسكوه.. ولبدوه في السجن عشانه ماخذ حرمتين وما لهن
إزرحوت.. يعني قام ونبش على حاله.
وأبو جفال بيقول: الله لا يجبرك.. بتستاهل.
الدعاء
الولد وده يمشي مشوار في سيارة أبوه، وركب فيها، وبيعطي
سترتر.. وخلص البطرية لأبوه.
أبوه تعصبن عليه، وقال: الله لا يكود لك، حط الكود، كود
ربنا ياخذك.
والله يستر من هالدعوة اللي دعاها على ولده.
الحظ
اللي ما له بخت لا يتعب ولا يشقى.
أبو سالم مسكين على باب الله، ولولا هالأكمن نعجة عنده
غير الظيعة تاكله.
ولمن حرث قطعة الأرظ ربنا يسر له بجرة فخار مليانة
ذهب.. صار يخبط في حاله.. عمره ما شاف ذهب بالكمية هيذي.. والعرب فزعت
له، والرجّال ما صحّ له ولا حاجة.
الخبر وصل للمسئولين في الآثار، وأخذوا الجرة، وكحتوه
من الأرظ، وقاموا يبعكشوا الحفريات.
حديث البنات
البنات بيتخرفن مع بعظهن، فاتحات ديوان.
وحدة منهن قالت: والله إنيه مبسوطة اللي أبوي هالسنة ما
بذر.. إتريحنا من البذار وهمّ القشّ.
قالت صاحبتها: والله يا خيتكي، الناس تغيّروا وبيكفروا،
وبيكتلوا في بعظهم، وربنا غظب عليهم وحبس عنهم المطر. وإنتي مبسوطة؟!
إدعي كود ربنا يرحمنا برحمته، والناس تستعتبر من قلة المطر.
الخبيزة
أبو مفظي بيقول: والله نفسيه في الخبيزة. وهالسنة هيذي
ما في خبيزة.
سمعه أبو جفال وقال له: أي هو همك على بطنك!! والله لو
الحلال بيحكي كان قال: نفسيه في العشب!. وكمان الناس نفسهم في الحامظ..
إدعي ربنا يرحمنا برحمته.
تنويمة العيّل عند العرب واليهود
عند العرب: نام نام يا بابا.. وعليها بخشيش: باذبح لك
جوز الحمام.
وعند الخواجه: نومي نومي يلداتيه...
وما فيه عندهم "توسيفت" حمام، ولا ذبح!!.
قارمة في مراح الحلال
أبو محمد كل سنة بيصيدوه جماعته.. بياخذوا منه حلال
وظحايا، وما بيسدّوه إلا السنة المقبلة.
قام وحط شيلط في مراح الحلال، وكتب فيها: ما بداين،
والرزق على الله... وعيب عليكو تاكلو الظحية وما تسدوا حقها!!.
|
