العدد  448     الثلاثاء 12/6/2007     26 جمادى الأولى 1428 هـ

أم بريص- زاوية ساخرة

الطلبات النسائية

  الوظع صعب، والجيبة فاظيه، والزلمة ما معه اللي ترنّ. وهيذي مرته لمنها نفسها في حاجة بتقوطر على عمتها عشان تجيب لهيه اللي ودها إياه.

  وعمتها بتقول لولدها: يعلم الله إنه مرتك مخلف، بتطلب طلبات كثيرة هالأيام هيذي.

  والحرمة مش مخلف ولا حاجة.. لاحت لهيه فرصة وصارت تطلب طلبات على حساب الخلفة.. وهي مش مخلّفة ومش مخلف.

العنف في الأسرة

  الرجّال ظرب الحرمة بالكرباج، وظلت ماكنة.

ولمن شافها قال لهيه: السكوت علامة الرظا.

الجحش

  ولد أبو محمد بيصيّح وبيقول لأبوه: سرقوا ليّ الجحش.

  وشيعوا ناس لأبو اللي سرق مشان الجحش، ولمنهم خشوا في الموضوع هتبرير إنه جحش بسكليت، وسكروا التيك، وصاروا يظحكوا على الجحش، وفكت هالقصة.

المشكلة إنهم خسّروا راعي البيت عشوة.

إكس-لارج XL

أبو سالم بيسعل ولده: إيش هالأكسات اللي في شهادتك؟

قال له: يا إيباه.. أناه ما بجيب لك غير الإكسات.. هيذي إكس-لارج يعني أكبر علامة.

تغيير العيسك

  أبو مفظي مسوي له عيسك وبيبيع فيه برابيش بلاستيك.

وبعد شهرين العيسك بطّل يمشي، قام وفتح عيسك فلافل شوارما ستيك.

وبدال ما يمشي يشتري شيلط جديد مكتوب عليها ستيك، قام وصار يمحي هالأكمن حرف من بلاستيك، وصارت ستيك، لأنه الشيلت بتكلفه دراهم.

يا داير ع الطواحين

قلع الطاحونة مش بالهين، وهيذي طاحونة الشيخ لمنه سواها في أرظه، قالوا له النشامى هيذي مش أرظك ودمروها بالتركترات. قال الشيخ: وديه كمان أقلع طاحونتيه اللي بطحن عليها الخبز، عشان ما تِذكر على باليه من وجعها.

ترمبات حسب الأصول

الزلمة ماخذ حرمته لهيه دور في الحكمة، وهمه ماشيين في السيارة شافوا أبو سالم بيشوح وده ترمب. ما وقفوا له.

وأبو سالم زعل عشان الرجال ما وقف له، ولمن لاقاه صار يعاتب فيه ويقول: وليش ما وقفت لي؟ قال له: يا زلمة.. الحرمة معي راكبة قدام، وكيف ودك أركبك على الكراسي اللي وراء والحرمة قدّام؟ عيب عليّ.

قال له أبو سالم: ماش خلفه، بسيطة.. مش زعلان هالحين.

المكيف

لأول مرة أبو جفال مركب له مزقان في الدار. وشغّل الكفتور وقيّل. ولمنه قعد من النوم صار معه شلشول.

وعلم أبو مفظي بالقصة، وصار يظحك عليه. وقال له:

أي هو إنته ودك تتمزق ببلاش؟ أناه ياخوك بمزع قيلولة في الشق، وبتغطى بالعباة، وأم مفظي بتبخبخ بالبريش، وهالطياب طبيعي.. مش زيك صرت في مدينة.

كنيون بلا حوانيت!

أبو مفظي وهو بيلفلف في السبع بالتيوتا، لقي عشر شلطيم، وجابهن. وحطهن على الكير اللي قدّام الدار. والشلطيم دعاية للحوانيت واسم الدكان.

ولمن الماعم والماس هخنساه بيلفلفوا في المنطقة، سووا كبسة على بيت الرجّال، بيحسابوا فيه حانوت، وطلعوا على البلوش.. يعني على الفاظي.. ما لقيوا غير أم مفظي بتطلع الغسيل من الغسالة اللي في العريشة.

   إطبع                                         أرسل إلى صديق

العودة إلى صفحة العناوين

مطلوب

مجلس حورة المحلي